ਕਰੀ ਵਾਲੇ ਗਾਰਲਿਕ ਕਿਨੋਵਾ ਉਪਰ ਟਿੱਕਾ ਮਸਾਲਾ ਬੇਕਡ ਆਂਡੇ ਅਤੇ ਭੋਰਿਆ ਪਨੀਰ

ਮੀਡੀਅਮ ਸਾਈਜ਼ ਦੀ ਓਵਨ-ਪਰੂਫ਼ ਕੈਸਰੋਲ ਡਿਸ਼ ਨੂੰ ਥੋੜਾ ਜਿਹਾ ਤੇਲ ਲਗਾਓ ਅਤੇ ਇਕ ਪਾਸੇ ਰੱਖ ਲਓ। ਓਵਨ ਨੂੰ 375 ਫਾਰਨਹੀਟ `ਤੇ ਪ੍ਰੀਹੀਟ ਕਰੋ।

ਮੀਡੀਅਮ ਸਾਈਜ਼ ਦੀ ਕੜਾਹੀ ਵਿਚ ਸਬਜ਼ੀਆਂ ਦੀ ਤਰੀ ਅਤੇ ਕਿਨੋਵਾ ਪਾਓ। ਇਸਨੂੰ ਉਬਲਣ ਦਿਓ। ਫਿਰ ਸੇਕ ਘਟਾ ਦਿਓ ਅਤੇ ਇਸਨੂੰ ਢੱਕਣ ਨਾਲ ਢੱਕ ਦਿਓ। ਹੌਲੀ ਹੌਲੀ ਰਿੱਝਣ ਦਿਓ ਤਾਂ ਕਿ ਕਿਨੋਵਾ ਸਾਰੇ ਤਰਲ ਨੂੰ ਜ਼ਜਬ ਕਰ ਲਵੇ। ਇਸਨੂੰ 15-20 ਮਿੰਟ ਲੱਗਣਗੇ। ਹੁਣ ਕਿਨੋਵਾ ਨੂੰ ਕੜਾਹੀ ਵਿਚੋਂ ਕੱਢ ਕੇ ਇਕ ਬਾਊਲ ਵਿਚ ਪਾ ਲਓ।

ਉਸੇ ਕੜਾਹੀ ਵਿਚ ਔਲਵ ਆਇਲ ਨੂੰ ਮੀਡੀਅਮ ਸੇਕ `ਤੇ ਗਰਮ ਕਰੋ। ਇਸ ਵਿਚ ਲਸਣ ਪਾ ਕੇ ਇਕ ਮਿੰਟ ਫਰਾਈ ਕਰੋ। ਇਸ ਵਿਚ ਕਰੀ ਪਾਊਡਰ ਪਾ ਕੇ ਰਲਾਓ, ਫਿਰ ਕਿਨੋਵਾ ਪਾ ਕੇ ਮਿਲਾਓ। ਕਰੀ ਕੀਤੇ ਗਏ ਕਿਨੋਵਾ ਨੂੰ ਤੇਲ ਲਗਾਈ ਹੋਈ ਕੈਸਰੋਲ ਡਿਸ਼ ਵਿਚ ਪਾ ਕੇ ਇਸਦੀ ਇਕਸਾਰ ਤਹਿ ਬਣਾਓ ਤਾਂ ਕਿ ਇਹ ਟਿੱਕਾ ਮਸਾਲਾ ਬੇਕਡ ਆਂਡਿਆਂ ਦਾ ਬੇਸ ਬਣ ਜਾਵੇ।

ਟਿੱਕਾ ਮਸਾਲਾ ਸੌਸ: ਮੀਡੀਅਮ ਪੈਨ ਵਿਚ ਤੇਲ ਪਾ ਕੇ ਮੀਡੀਅਮ-ਹਾਈ ਸੇਕ `ਤੇ ਗਰਮ ਕਰੋ। ਇਸ ਵਿਚ ਪਿਆਜ਼ ਪਾ ਕੇ 10-15 ਮਿੰਟ ਤੱਕ ਭੁੰਨੋ ਤਾਂ ਕਿ ਪਿਆਜ਼ ਗੋਲਡਨ ਬਰਾਊਨ ਹੋ ਜਾਣ। ਇਸ ਵਿਚ ਕਰੱਸ਼ਡ ਟਮਾਟਰ ਪਾ ਕੇ ਮਿਲਾਓ। ਫਿਰ ਲਸਣ ਪੇਸਟ, ਅਦਰਕ ਪੇਸਟ, ਧਨੀਆ ਪਾਊਡਰ, ਜੀਰਾ ਪਾਊਡਰ, ਮਿਰਚ ਪਾਊਡਰ ਤੇ ਹਲਦੀ ਪਾਊਡਰ ਮਿਲਾਓ ਅਤੇ ਕੁਝ ਮਿੰਟ ਤੱਕ ਪੱਕਣ ਦਿਓ। ਇਸ ਵਿਚ ਖੰਡ, ਨਮਕ ਅਤੇ ਗਰਮ ਮਸਲਾ ਪਾ ਕੇ ਮਿਲਾਓ। ਹੁਣ ਕਰੀਮ ਪਾ ਕੇ ਮਿਕਸ ਕਰੋ। ਪਾਣੀ ਨਾਲ ਸੌਸ ਨੂੰ ਪਤਲੀ ਕਰੋ। ਇਸ ਤੋਂ ਬਾਅਦ ਨਿੰਬੂ ਦਾ ਰਸ ਪਾ ਕੇ ਮਿਲਾਓ। ਟਿੱਕਾ ਮਸਾਲਾ ਸੌਸ ਤਿਆਰ ਹੈ।

ਲਕੜੀ ਦੀ ਕੜਛੀ ਦੇ ਹੈਂਡਲ ਨਾਲ, ਕਰੀ ਕਿਨੋਵਾ ਬੇਸ ਵਿਚ ਛੇ ਹੋਲ ਕਰੋ ਤਾਂ ਇਹਨਾਂ ਵਿਚ ਆਂਡਿਆਂ ਨੂੰ ਪਾਇਆ ਜਾ ਸਕੇ। ਹਰੇਕ ਹੋਲ ਵਿਚ ਇਕ ਇਕ ਆਂਡਾ ਤੋੜ ਕੇ ਪਾ ਦਿਓ। ਆਂਡਿਆਂ ਦੇ ਆਲੇ ਦੁਆਲੇ ਟਿੱਕਾ ਮਸਾਲਾ ਸੌਸ ਪਾ ਦਿਓ ਤਾਂ ਕਿ ਕਿਨੋਵਾ ਪੂਰੀ ਤਰ੍ਹਾਂ ਕਵਰ ਹੋ ਜਾਵੇ। ਹੁਣ ਇਸ ਉਪਰ ਭੋਰ ਕੇ ਪਨੀਰ ਪਾ ਦਿਓ।

ਪ੍ਰੀਹੀਟ ਕੀਤੇ ਓਵਨ ਵਿਚ 20-25 ਮਿੰਟ ਤੱਕ ਬੇਕ ਕਰੋ ਤਾਂ ਕਿ ਆਂਡਿਆਂ ਦੀ ਜਰਦੀ ਪੱਕ ਜਾਵੇ। ਇਸਨੂੰ ਹਰਾ ਧਨੀਆ ਅਤੇ ਗਰਮ ਮਸਾਲਾ ਨਾਲ ਗਾਰਨਿਸ਼ ਕਰੋ।